Historia dalla secziun Péz Alpetta
In per patratgs sur dalla secziun da catschadurs Péz Alpetta
La secziun da catschadurs Péz Alpetta Mustér vegn en prest 85 onns veglia. Duront quels decennis ein nos commembers s’engaschai cun perschuasiun per in saun prosperar dalla secziun. Igl intent da promover fauna e flora sco era ina buna colloboraziun denter ils catschadurs ei per gronda part gartegiada. E sche nos meinis ein buca adina ils medems anflein nus adina in consens democratic.
Grazia al grond engaschi da numerus commembers cun activas suprastonzas ei vegniu purschiu bia als catschadurs duront tut ils onns cun l’erecziun dil vegl e pli tard dil niev stan da sittar. Duront differents onns ei vegniu eregiu starlieras per perver las selvaschinas duront ils stregns unviarns. Oz ei la filosofia da preveder per las selvaschinas zonas da ruaus duront ils meins d’unviern ed aschia garantir igl impurtont e necessari ruaus.
La secziun Péz Alpetta ha redigiu igl onn 1979 il cudisch (La catscha el cantun Grischun). In grondius cudisch per la scolaziun da catschadurs/a en lungatg romontsch. Igl onn 2009 ei la cronica dalla secziun Péz Alpetta vegnida registrada en in cudischet. Ils statuts ein adina puspei vegni surluvrai ed actualisai al temps hodiern.
Mo per capir igl avegnir eisi buca da tralaschar la historia. Nossa secziun sto s’engaschar cun forza per ina sauna catscha cun il duiu respect enviers la selvaschina. Il mument tier nus ei il luf ed il luf tscharver ina gronda concurrenza. Els ston setener vid negins reglements e leschas. Nossa tiara ei oz semplamenin memia pintga per possibilitar tut dapertut. Ed ussa vul ina gruppaziun aunc ralisar il (Parc Adula). Lein nus veramein far ord nossas bialas vals in museum? Catschadurs, ei dat buca in parc senza grondas restricziuns e per quei seiges allerts.
Jeu giavischel che nos giuvens catschadurs s’engaschien per nossa catscha e secziun el futur cun plascher ed ardiment.
Clemens Berther